Tetun: MENSÁJEN HUSI SUA EXELÉNSIA PREZIDENTE REPÚBLIKA IHA LORON HALOOT FUNDADOR MOVIMENTU UKUN RASIK AN, ERÓI NASIONAL, MA’HUNO BULEREK KARATAIANO, BUKAR

Metinaro, 28 Setembru 2021 Ohin Estadu Timor-Leste, hamutuk ho família rasik no família boot harii no hametin iha tempu luta nian, haloot erói nasional ida, kamarada no kompañeiru, António João Gomes da Costa, ho naran asu’ain, Ma’Huno Bulerek Karataiano, koñesidu horiuluk, nu’udar Manecas no iha tempu luta, nu’udar Bukar. Ita haloot líder polítiku ida ne’ebé fó kontribuisaun as tebes ba luta libertasaun nasional tanba nia halo parte núkleu fundador, jerasaun ida ne’ebé fanun ita-nia ema, iha dékada setenta, atu hamriik ho orgullu, nu’udar Povu ida, ne’ebé iha kbiit atu Ukun Rasik-an. Foho Ramelau, ho tutun as liu, iha Timor-Leste, nakfila ba símbolu forsa Povu Maubere nian, atu hamriik duni, ho barani no determinasaun. Iha tinan 24 nia laran, keridu kompatriota Bukar, nunka hasees-an husi nia ideal luta atu liberta Pátria. Ninia kontribuisaun tama iha ita-nia istória luta libertasaun Pátria, nu’udar Fundadór ASDT no FRETILIN, membru Comité Central FRETILIN, Xefe Konsellu Polítiku Militár Frente Armada, Sekretáriu Komisaun Diretiva FRETILIN, Komandante FALINTIL no Sekretáriu Rejiaun 3; protagonista prinsipal ida mós ba prosesu reorganiza luta iha 1981; ninia kargu polítiku ikusliu, molok referendu 99, mak Segundu Vise-Koordenador Conselhu Prezidensiál FRETILIN, iha Frente Klandestina, simu iha Konferénsia Nasional Estraordinária FRETILIN, halo iha 1998, iha Sydney, Austrália, ho partisipasaun ami hotu nian, liuhusi telefone satélite. Importante fó-hanoin ohin, katak hafoin sai husi kadeia, biar iha situasaun mate laran, Ma’Huno buka dalan oinseluk, atu kaer metin nafatin ninia ideal harii Nasaun Timor-Leste, hamutuk ho kombatente sira seluk, iha frente luta hotu-hotu. Ma’Huno ninia kontribuisaun ba ita nia vitória boot tebes! Estadu Timor-Leste rekoñese no valoriza Ma’Hunu liuhusi kondekorasaun Ordem Boa Ventura, iha 2006. Iha 2018, ho naran Estadu Timor-Leste nian, ha’u rasik, nu’udar Prezidente Repúblika, kondekora erói nasional ne’e, ho Ordem Timor-Leste, Grau Colar. Ohin ita haloot nia isin maibé ita la haloot nia istória barani, ninia determinasaun, ninia dedikasaun, ninia espíritu sakrifísiu, ninia ideal atu kore Povu tomak husi mukit iha ita-nia Timor-Leste livre no independente. Ideal hasa’e moris-di’ak ba Povu tomak mai mós husi jerasan Ma’Huno nian - núkleu fundador movimentu nasionalista dahuluk iha Timor-Leste. Ita hotu iha dever atu haktuir sira nia mehi no hakarak!. Fatin haloot erói no mártir sira, hanaran ohinloron nu’udar “Jardim dos Heróis da Pátria” hodi fó hanoin ba ita hotu atu mantein Jardin ne’e funan hela de’it ho prinsípius no valores sira ne’ebé hametin ita durante luta liberta Pátria. Tanba moras hela mak ha’u labele mai to’o “Jardim dos Heróis da Pátria”, iha Metinaro, hodi hamaluk família tomak, husi soren hotu-hotu no família boot liu, ne’ebé halo parte ita-nia istória luta liberta Pátria. Ha’u hato’o hakoak boot ba família tomak iha Lautém husi espoza dahuluk, saudoza Julieta da Costa. Hakoak boot ba mós família tomak iha Manatuto no fatin sira seluk, husi Ma’Huno rasik no espoza daruak, señora Terezinha Viegas. Hakoak espesial ba oan mane boot Lerehoponu no oan tolu tan, Shadana, Techi no Cesar. Viva Erói Nasional, keridísimu kompatriota Bukar! Honra no glória ba nia memória!

Descansa em Paz!