Tetun: GRUPU ARTE MARSIAIS NO ARTE RITUAL HALO KOMPRIMISIU HODI HAMETIN FRATERNIDADE IHA ATABAE

Atabae, 16 novembru 2021 (SRP) – Ministeriu Interior liu hosi Diresaun Nasional Prevensaun Konflitu Komunitaria (DNPKK), servisu hamutuk ho g+7 realiza programa dialogu no rekonsiliasaun entre eis Grupu Arte Marsiais no Arte Ritual kompostu husi PSHT, IKS, KORK no 77, 55, Kolimau, THS-THM hodi halo mediasaun iha nivel komunitaria ne’ebe hala’o iha Suku Aidaba Leten, Postu Administrativu Atabae, Munisipiu Bobonaro. Vise-Ministru Interior, Antonio Armindo, ne’ebe sai sasin ba juramentu Grupu Arte Marsiais no Arte Ritual ne’e hateten, husu atu ema hotu kumpri juramentu ne’ebe halo hodi hadok an hosi violensia. “Ohin ita sai sasin ba serimonia ritual no dame malu entre Grupu Arte Marsiais no Arte Ritual iha fatin ida ne’e liu hosi juramentu ba bandeira lulik RDTL no Maromak katak hahu hosi loron ohin 16 novembru 2021 prontu lolo liman ba malu hodi simu no dame malu hanesan maun alin. Tanba ne’e tenke loyal ba komprimisiu ne’ebe halo ona hodi hametin nafatin unidade no fraternidade ida ne’e”, hateten Vise-Ministru Antonio Armido ba partisipante sira iha salaun Postu-Administrativu Atabae, tersa ne’e. Antonio Armindo, konsidera juramentu ne’e importante no nia husu atu joven sira kumpri akordu ne’e no labele uza tan kroat hodi ameasa malu tanba kualker aktu violensia sei prosesa tuir lei ne’ebe vigora iha Timor-Leste. “Ita hotu entende katak modalidade Arte marsiais nia pratika ohin loron iha mundu rai klaran ninia orientasaun ba liu desportivu ho objetivu prinsipal maka kompetisaun enkuantu Artes Rituais iha ninia pratikas maka defesa pessoal liu husi asaun rituais ho esensia halo kalma isin (fiziku) no klamar (espiritual). Tanba ne’e Guvernu iha ona inisiativa no buka dalan hodi formaliza no halo reajustamentu ba estrutura GAM nune’e iha futuru bele sai hanesan arte desportu ida”, afirma. Governante ne’e mos husu ba GAM no Artes Rituais sira hotu atu asegura paz no estabilidade hodi kontribui ba prosesu dezenvolvimentu iha Timor-Leste. “Hanesan ema Bunak oan hau sente ita mesak uma mane feto san deit. Entaun ho eventu ida ne’e fanun ita atu hanoin ona katak unidade tenke hahu iha fatin ida ne’e. Tanba ne’e hau husu ba Grupu Arte Marsiais hotu iha timor laran tomak atu iha hanoin no espiritu joventude nian labele iha tan konfrontasaun maibe buka esforsu an atu hadia moris no hametin liu tan unidade tanba ho nune’e maka bele kria paz no estabilidade iha Suku ida ne’e nomos nasaun kik ida ne’e”, sujere.

Sermonia dialogu no rekonsiliasaun entre eis Grupu Arte Marsiais no Arte Ritual ne’e hetan mos partisipasaun hosi Komandante Komandu PNTL Munisipiu Bobonaro, Superintendente Polisia, Antonio Mauluta, Administrador Postu Atabae, Lino Tavares, Diretor Operasional g7+ Felis Piedade, Prezidente Komisaun Reguladora Arte-Marsiál (KRAM), Octaviano da Conceição, Diretor Nasional DNPKK, Antonio Viegas, Komandante Bombeiros Maliana, Vitorino Lopes, Komandante BOP COP C, Rosalino dos Santos, Autoridade lokal, veterano no bainaka importante seluk iha Suku Atabae nia laran.