Tetun: Abu Dhabi, 2 dezembru 2021- Ministra Negósius Estranjeirus no Kooperasaun Repúblika Demokrátika Timor-Leste, Sua Exelénsia Dra. Adaljiza Magno hala'o vizita kortezia ba S.E. Ahmed bin Ali Al Sayegh, Ministru Estadu Negósius Estranjeirus no Kooperasaun Internasionál husi Emirates Árabes Unidus (EAU) ba rejíaun Ázia Pasífiku.

S.E. Ministru Ahmed apresia tebes Ministra Magno nia esforsu mai to'o iha Abu Dhabi no S.E. Ahmed mós sei halo fali vizita kortezia ba Timor-Leste (T-L) wainhira situasaun Covid-19 laiha ona. Iha enkontru ne'e Ministra Magno, lori Governu T-L nia naran, kongratula S.E. Ahmed, relasiona ho Loron Nasionál Emirates Árabes Unidus nian ba dala-50. Xefe Diplomasia Timoroan ne'e relata mós kona-ba Expo Dubai 2020, fo agradese ba Governu no povo EAU ba apoiu tomak ne'ebé T-L simu hanesan espasu ba Expo Dubai 2020 ho apoiu lojístiku sira seluk. Oportunidade ida ne'e informa mós ba S.E Ministru Ahmed katak, T-L fo apoiu ba kandidatura Emirates Árabes Unidus nian ba Interpol no IMO (International Maritime Organization) ba kategoria B, no S.E. Ahmed apresia T-L nia apoiu determinante atu lori vitória ba EAU nia kandidatura. Xefe Diplómasia nain rua ne'e mós ko'alia kona-ba rezultadu husi COP26 iha Glasgow, katak iha rezultadu signifikativu balun ne'ebé COP26 atinji. EAU sei prontu atu organiza COP28 iha Dubai. Ministra Magno informa katak T-L mós hanesan países sira husi pasífiku hetan impaktu maka'as husi Alterasaun Klimátika. T-L sofre tinan rua (2020 no 2021) inundasaun boot rua ne'ebé ema barak lakon nia vida no hetan estragus infraestrutura barak. Iha enkontru ne'e S.E. Ministra Magno akompaña hosi Onoráriu Konsul Jerál T-L iha Beirut, Lebanon, S.E. Joseph Issa, Enviadu Espesiál T-L ba Expo Dubai 2020, Sr. Arif Abdullah Sagran, Diretór-Jerál ba Asuntu Multilaterál no Rejionál, no Asesór Polítiku-MNEK.

Fatin: Sala enkontru Embaixadór-MNEK, Abu Dhabi.