Tetun: MADRE ALMA FAHE DOMIN NATÁL LIUHUSI UPF BA KOMUNIDADE SIRA IHA BADUT MEAN

Balibo, 26 dezembru 2021 (SRP) – Komandante UPF, Superintendente Polísia Euclides Belo, hateten iha tempu natál ne’e Madre Alma halo karidade hodi tulun fó prezente Natál liuhosi UPF ba komunidade sira ne’ebé merese duni atu hetan tulun iha Badut Mean, Aldeia Railuli, Suku Cova, Postu Administrativu Balibo, Munisípiu Bobonaro. “Natál nudar tempu di'ak ida atu tulun malu ajuda maun alin sira ne’ebé merese duni atu hetan apoiu. Entaun oportunidade ida-ne’e ha'u apresia no orgullu ba madre Alma sira ne'ebé halo karidade hodi fó tulun oferese prezente Natál hanesan fos no supermie ba maun alin sira iha ne’e. Ita hotu hatene madre sira servisu iha vida espirituál no sira la manan osan la halo to’os no natár maibé iha tempu difisíl hanesan ne’e Igreja liuhosi Madre Alma sira ho fuan boot hola parte hotu hodi ajuda suporta nia povu iha área rurál”, Euclides Belo hateten lia-fuan korajen ne’e iha ámbitu natál hamutuk ho komunidade kbiit laek sira iha Badut Mean. Euclides hateten, daudaun ne’e dalan ba área Badut Mean kotu tanba ne’e UPF halo patrulla tenke lao ain ho distánsia ida ne’ebé dook tebes. “Atu informa mós katak dalan ba área Badut Mean provizoriu karreta labele liu tanba mota kiik oan ne’ebé kompañia ateru bee lori tiha sorin maibé tanba domin ne’ebé klean husi madre Alma sira ba komunidade kbiit laek iha área izoladu fronteira hodi fó apoiu ai-han liuhusi UPF, ami hatutan hela ba sira”, salienta.

Ikusliu Komandante UPF ne’e lori madre Alma sira-nia naran hato’o boas festas santu natál no ksolok tinan foun ba komunidade Badut Mean no lori nia naran hato’o agradesementu klean ba komunidade sira ne’ebé durante ne’e kolabora di'ak ho UPF.